برمته

برمته د ګرو سره نژدې مفهوم افاده کوي. د مرکې د فيصلې د منلو له پاره د مرکې د اعتماد په منظور دواړه طرفه بايد د دوی په اندازه پيسې يا جنس و مرکې ته ور کړي. چي کله فيصله وسي، هغه بايد ومنل سي، کنه برمته ئې سوځي. پر برمته کي باالعموم توپک ډېر رواج لري، کله چي فيصله وسي، نو که کوم طرف هغه و نه مني، برمته ئې و مقابل طرف ته ور کوي، يا ئې مرکه‌چيان ساتي (د ملامت برمته نه ور کول کيږي). دا په نرخ کي د پرنسيپ په حيث قبوله سوې ده، چي د ملامت (پړ) برمته نه ور کوي. برمته يو ډول تضمين دئ، چي په ټولو پښتني قبيلو کي د مرکې پر وخت اخيستل کيږي. په ځينو مواردو کي د يوه سړي په زوره بېولو ته هم برمته ويل کيږي.