غږ/ ږغ

غږ يا ږغ د آواز معنا ور کوي، خو به تعاملي اصطلاح کي چي کوم څوک د مرکې او جرګې غړو ته د ډوډۍ ست وکړي، دا غږ بلل کيږي. غږ د نارې په مفهوم هم راځي، کوم سړی چي پر پېغله ټک وکړي يا ئې پلو غوټه کړي، معنا په خپل نامه ئې کړي، دې ته هم غږ ويل کيږي. په يوه لويه پېښه کي چي د قبيلې غړي را ټوليږي، دې ته هم غږ وايي. په لوېديځو قبيلو کي دې غږ ته ږغ وايي. د يوه مهم کار له پاره چي د قبيلې خلک را ټوليږي، نو وايي چي ږغ ئې کړی دئ. ږغ پورته کول د شکايت په مفهوم هم راځي. ږغ سره پورته کېدل د دوو يا څو کسو د مخالفت او جنګ په معنا هم راځي. يو خوابدي خبر او اطلاع ته هم ږغ وايي.