Pashto Terminology of Pashtun's Tribal Customary Law and Usages [by M. I. Atayi; digit. Shamsullah Aryan]
آ ا ب ت ج خ د ر ز س ش ض غ ق ل م ن ه و ي ټ پ څ چ ډ ړ ږ ژ ښ ک ګ
سا ست سر سل سم سو سي سټ سپ
سپي سپک سپی

Give us a like, if you really like us! که ستاسو دغه پاڼه خوښيږي نو يې لطفا په يو لايک ونازوئ

سپین

سپین د تور ضد دئ. په قبیله کي هر سړی چي د جرم مرتکب سوی نه وي سپین دئ خوکه د جرم مرتکب سو نو (تور) بلل کیږي. که د سپین کلمه راسي نو د بدن هغه برخه کله چي د ټپ او ژوبلي په برخه احتوا کوي چي څرګنده او ښکاره وي سترګي، پزه، غوږ، شونډي، لاسونه، تر څنګلو، پښې تر بجلکو او د مخ ښکاره غاښونه (سپین) بلل کیږي (۱). د عیسی د نرخ په قرار د دې سپیني برخي هر يو ځانته تاوان لري او د موسی په نرخ کي د سپین تاوان تر تور (د بدن پټه او مسطوره خوا) زیات دئ. په نفسي لحاظ د قبیلې هر سړی د تعاملي نرخ (قبيلوي قانون) په حکم سپين دئ، خو که ئې د نرخ له حد (ټک) څخه د تېري (تجاوز) خوا ته پښه واړوله، نو بيا (تور) دئ او د قبيلې د عرفي ټولني د قبول سوي قانون (نرخ) په حکم د تعقيب او جزا وړ دئ. لکه يو سپين چي تورېدای سي، نو دغه رنګه د نرخ په ټاکلي مقرراتو کي يو بې‌ګناه ثابت سوی مجرم (تور) سپين کېدای سي، د سپين او تور اصطلاحي کلمات په ټولو پښتني قبيلو کي په کاملاً بې‌تفاوته لهجه تلفظ کيږي او مفاهيم ئې په عين يو شان فهمول کيږي. د وزيرو په بېلو بېلو قبيلوي ښاخو کي چي د لرغوني قبيلې د مناسباتو مظاهر ژوندي ساتل سوي، نو په حقوقي ساحه کي د سپين او تور تعاملي اصطلاحات د ژورو مفاهيمو سره پراته دي. د رزمک نرخ (۲) يو سپين ته د هغه د قول په اعتبار صرف چي په خوله ووايي پر هر څه ئې اعتماد کوي، خو که ئې د دغه نرخ له اعتماد څخه په بده استفاده ژبه وښوروله او (نرخ پر واوښتله) يعني پر ثابته سوه، نو عبرتناکه جزا ور کوي. (۱): د ۱۳۱۸ل. کالنۍ، ۳۴۳ مخ. (۲): د رزمک څلور نرخيان د قاموس د (د) په رديف کي.
Source: [د کتاب نوم: د پښتني قبيلو اصطلاحي قاموس (حقوقي- جزايي- تعاملي)؛ ليکونکی: کانديد اکاډميسن محمد ابراهيم عطايي؛ چاپوونکې اداره: د پښتو څېړنو نړيوال مرکز کابل؛ د چاپ کال: ۱۹۷۸ز.؛ ډيجيټل کوونکی: شمس الله آرين، قاموسونه ټکی کام ۲۰۲۰ز.]