خوله ماتول

د واک په مرکه کي چي کله مرکه‌چيان يا مرکزن کومه فيصله وکړي، نو د فيصلې (پرېکړي) ابلاغ ته خوله ماتول وايي. د دغي پرېکړي څخه يوه خوا هم مخ نه سي ګرځولی او وايي، چي خوله ئې ماته ده. کله چي خوله ماته سي، يعني د واک د مرکې غړي خپله پرېکړه واوروي، نو په دغه ټاکلې قضيه کي بيا يوه خوا هم د شکايت حق نه لري او بله مرکه هم نه پر جوړيږي. کله کله چي مرکه داسي پرېکړه وکړي، چي دواړو خواوو ته د منلو وړ نه وي، نو کېدای سي، چي بله مرکه پر را وغواړي. په دغسي مورد کي نو وايي، چي مرکه ئې د خولې ماتېدو ته پرې نه ښووله. په عامه اصطلاح کي وايي، چي خوله ئې يو ځل ماته سي، بيا بايد و نه ښوري، يعني د مرکې پرېکړه بايد ومنل سي.