څلور ګوتي

د چړې، خنجر او توري تېغ په ټپ کي د زخم معيار څلور ګوتي دئ. که تر هغه کم وي، لږ پور او که زيات وي، ډېر پور په نرخ کي ټاکل کيږي. کېدای سي چي د يو سړی پر داسي ځای ټپ واخلي، چي هغه محرم وي او ښکاره کول ئې شرم وي، نو په دغسي وخت کي ټپ تر څلورو ګوتو زيات ګڼل کيږي، که څه هم کم وي. خو په دې لحاظ چي د شرم ځای ئې زخمي کړی وي، نو هغه ته لوړ معيار نيول کيږي. د بدن په بيلو بيلو برخو کي د څلورو ګوتو زخم ته بېل بېل تاوانونه ټاکل کيږي او په تعاملي نرخ کي دا هره برخه ټاکلی ځای لري.