to main page
Sayed Ganj Balochi Glossary [Sayad Zahoor Shah Hashmi]

پور

  1. [(پَ وْ رْ)]
    یکجا مُچّ ءُ جمبریں استار اَنت کہ تازی ءَ ایشاں,, ثُریا ،، گوش اَنت ءُ پارسی ءَ,, پروین ،، گوش اَنت کہ اے استار دانکہ چلّ روچ ءَ گندگ نہ بنت گڑا بلوچ گوش اَنت کہ,, پَور زمین ءَ اَنت ،،چوش ھم گوش اَنت کہ دانکہ پَور زمین ءَ اَنت سکّ گرم بیت ایشانی ھساب ءِ پرمان ءَ جون ءِ ماہ ءِ اولسراں در کاینت ( بلکیں 6 جون ءَ ) بلوچ ایشانی در آیگ ءِ نشان ءَ چوش دے اَنت کہ ھر وھد ءَ کہ پَور در کاینت گڑا اشتر بانگواہ ءَ دیم ءَ رودراتک ءَ کنت بزاں گوں پَوراں کنت ءُ رومُست کنت ، دانکہ پَور زمین ءَ اَنت گَلّہ ءِ کِشگ شرّ نہ اِنت کہ بے دان بیت چہ پورانی در آیگ ءَ ءَ رند شر اِنت ٢- چہ تنگو بزاں تلاہ ءَ جوڑ کرتگیں جنینی سھتے کہ بُن ئِے چو کمان ءَ اِنت ءُ سر ئِے توسک ، سے کُنڈیں ایرتکیں سَنکل ءُ شمشُک ءُ لرزک رنگیں چیزے ئِے ھم پِر اِنت ، کِرّان تاک ئِے ھم پِر اِنت ایشی ءَ یا کہ چہ گیوّار ءَ پیشانی ءِ سر ءَ یا کہ چہ سر ءِ کش ءَ ھُش ءِ سر ءَ لونجان کن اَنت ، پَور ءُ اَگرب: زالم ، بد زوراکی.
    Synonym: پَور
  2. [(پُ وْ رْ رْ)]
    سمات ، ھما ایرتیں ھاک کہ آئی ءَ بوچّ ءُ سمات مان اِنت ٢- چہ پیش ءَ جوڑ بوتگیں بولے کہ پہ لٹّ ئِے جن اَنت ءُ لیب کن اَنت ( چو ھاکی ءِ بول ءِ پیم ءَ ) ٣- لوڑ ءِ چکرّوکیں گوات ترّکو دیان اِنت ھر چیزے کہ آئی ءِ دپ ءَ کپ ایت اگاں سُبکّ اِنت بال ئِے دنت ،مزنیں لوڑ ءِ سر سکّ بُرز بیت - چُکّ کہ لیب ءَ بنت اگاں گند اَنت کہ پورّے پیداگ اِنت گڑا ھما دمان ءَ دپ ءَ یک کن اَنت گوش اَنت ،، پورّ دوجنی ءِ لوگ آ اِنت,, ایشانی وشمنّی ءَ گڑا پورّ ایشانی نیمگ ءَ نئیت ءُ دیم پہ ھما دو جنی ءِ گس ءَ روت.
    Synonym: پورّ
^ top of page