ملا

مذهبي مشر ته ملا ويل کيږي. ملا سربېره پر دې چي مسجد ساتي، لمونځونه ور کوي؛ د مړي د ګور او کفن خدمت هم کوي، نکاحي تړي. ملا د سپين پټکي په نامه په ننواتي کي هم ځي او کله چي د دوو قبيلو تر منځ توده جګړه روانه وي، نو ملايان قرآنونه پر سر نيسي او د جګړې ډګر ته داخليږي او په دې ډول جګړه بندوي. کله کله په جرګه او مرکه کي اصلي غړيتوب اخلي، خو په لويو جرګو کي ملا د جرګې اصلی غړی نه وي، بلکي د دعا له پاره هلته ور ځي، په دغسي جرګو کي ملا د جرګې څخه ليري کښېني او کله چي جرګه فيصله صادروي، نو ملا ته دعوت ور کوي او هغه د خير دعا کوي. د ځينو جرګو په پای کي چي خيرات کيږي، د هغه سرپرستي نو په منظم ډول د ملا پر غاړه وي.