سټه دميراتي په شان يوه چپاوي حمله ده چي په هغه کي نارينه وژل کيږي او کورونه سوځل کيږي. سټه لکه چي د کلمې څخه معلومه ده د سټي ايستلو ته وايي يعني بنياد د منځه وړل. په وزيرو کي سټه د بدۍ په وخت کي ډېره عملي کيږي. سټه دچپاو په شان وي او هر ډول وسله پکښي استعماليږي. په سټه کي کله کله د هغي کورنۍ يا قبيلې ښځي هم ور سره بيايي چي سټه پر سوې وي. د لوېديځي خوا د زميندارو په اليزو کي هم دغسي يو اصطلاحي نوم سته چي (عيالتپ) ورته وايي او په دغه عمل کي هم د کورنۍ نارينه که د زانګو کوچنی هم وي، وژني ئې، خو اوس دا رسم نسته ولي نوم ئې لا تر اوسه پاته دئ.
Source: [د کتاب نوم: د پښتني قبيلو اصطلاحي قاموس (حقوقي- جزايي- تعاملي)؛ ليکونکی: کانديد اکاډميسن محمد ابراهيم عطايي؛ چاپوونکې اداره: د پښتو څېړنو نړيوال مرکز کابل؛ د چاپ کال: ۱۹۷۸ز.؛ ډيجيټل کوونکی: شمس الله آرين، قاموسونه ټکی کام ۲۰۲۰ز.]