ډولچي ته ډولزن هم وايي او دا نو هغه سړی دئ چي ډول وهي. په ځینو قبیلو کي ډولچي ته غازي هم وايي، اغلباً چي دغه اعزازي نوم به د نولسمي پېړۍ په دوران کي هغه وخت ډولچي ته په نصیب سوی وي چي دغه قبایل به دا جنپي قدرت او استعمار سره لاس و ګرېوان وه. ډولچي د قبیلو په جګړو کي یو څه مصونیت هم لري او څوک چي ډولچي په جګړه کي وژني نو پېغور يې په نصیب کیږي. ډولچي د جګړې په وخت کي تر بیرغ لاندي روان وي او پخه ډولچیان د جګړې په وخت کي د صفونو د نظم ساتلو کار هم کوي او دغه کار نو د ډول په اواز کوي، د دغسي ډولچي د ډول وهلو د هر طرز سره د قبیلې اشنا وي.
Source: [د کتاب نوم: د پښتني قبيلو اصطلاحي قاموس (حقوقي- جزايي- تعاملي)؛ ليکونکی: کانديد اکاډميسن محمد ابراهيم عطايي؛ چاپوونکې اداره: د پښتو څېړنو نړيوال مرکز کابل؛ د چاپ کال: ۱۹۷۸ز.؛ ډيجيټل کوونکی: شمس الله آرين، قاموسونه ټکی کام ۲۰۲۰ز.]