ټکری اخيستل

ټکری اخيستل يو تعاملي حق دئ، خو په دې شرط چي مابعد مراتب ئې په ننواتي سره سرته ورسيږي. کوم سړی چي د بې مېړه پېغلي ټکری واخلي، هغه بايد ننواتی د پېغلي پلار ته ور کړي او هغه ولور هم بايد تاديه کړي، چي د پېغلي پلار ئې ټاکي. په دې ځای کي ټکری اخيستونکی حق نه لري، چي د هر څومره هغه ولور څخه چي د پيغلي پلار ئې ټاکي، نټه وکړي او که دا کار وکړي، نو دی مجرم دئ او بيا بايد د بدۍ تاوان ته تيار سي. په عامه اصطلاح کي ټکری اخيستل د ږغ کولو سره چي د کندهار او هلمند په خلکو کي ناره ورته وايي، څه توپير نه لري. صرف ناره په عمومي ډول د ښځي له خوا پر نر ږغ کوي دي، خو په ختيځو قبيلو کي نارينه چي هم پر ښځه ږغ وکړي او ووايي، چي دا زما ده. په دې برخه کي هم مقررات هغسي دي، لکه په ږغ کولو کي چي پر ځای کيږي. ټکری اخيستل د ټک کولو سره هم مشابه عمل دئ، ځکه په هغه کي هم دا خبره پرته ده، چي يو نارينه پر پېغله ږغ کوي، چي دا زما ده. که کوم څوک د مړوښي ښځي ټکری واخلي، نو دا يو دروند شرم لري او په پخه طريقه به ننواتي هم پر ځای کوي. د داسي عمل مقابله اکثراً په مرګ او وژلو کيږي.