ټکری

ټکری د پړوني معنا ور کوي او مجازاً د ښځي په مفهوم راځي. د ټکري احترام او درناوی پر هر چا فرض دئ. وايي (ټکری او پټکی) ساري دي. دا د قبيلې قانون دئ، يعني ښځه او نارينه په حقوقو کي برابر او يو شی دي. کوم څوک چي د ښځي پر حقوقو تېری وکړي، هغه د ټکري پر حق د تيري کوونکي په نامه ياديږي. په مرکه او جرګه کي چي کله ښځه د يو چا شفاعت وکړي، د هغه احترام بايد وسي او که په بې احترامۍ ئې جواب ور کول سي، د ټکري شرم به ور کوي. که ښځه پر هر څومره ګناه‌کار سړي ټکری وغوړوي، نو تر کله چي ټکری پروت وي، څوک ئې د وژلو حق نه لري، که د نه د ټکري شرم به ادا کوي.