مېلمه

مېلمه د لوی حق خاوند بلل کيږي. مېلمه د کوربه په کور کي د خاص مصؤنيت لرونکی وي او که څوک د چا مېلمه ته زيان ور رسوي، نو دا د کوربه پر حق تېری بلل کيږي او حق لري تېری‌کوونکی داسي تعقيب کړي، لکه د ده د کورنۍ او قبيلې غړي ته چي ئې زيان رسولی وي (د مېلمه د مرګ تاوان وګورئ!). مېلمه درلودل د عزت نخښه ده او مېلمه جوابول د لويي بې‌غيرتۍ علامه ده، مېلمه که هر څومره لوی مجرم وي، خو کله چي د يو چا په کور کي مېلمه سو، نو نه يوازي کوربه بلکي د مېلمه دښمنان هم څه ورته ويلای نه سي. په ځينو قبيلو کي نه يوازي مېلمه ته ډوډۍ او ځای ور کوي، بلکي چي ځي، يو څه سوغات هم ور سره ور کوي.