ترینگ

چکرینگ، گردینگ ، بیرہ دیگ ، سیل کنائینگ ، پِرّ تَرّینگ ، مٹّ کنگ ، بدل کنگ ، چہ یک جاورے ءَ پہ دگہ جاورے تَرّینگ ، سْیاھگے ءَ چہ یک زبانے پہ دگہ زبانے ءَ ترّینگ بزاں مَٹّ کنگ . ( ترجمہ کنگ ) ( Totranslate)آپ ءِ ترّینگ : کور یا،جُو ءِ آپ ءِ راہ ءَ تَرّینگ کہ دگہ جاگھے بروت ۔اشکرانی تَرّینگ : پہ مُرگانی بال دیگ ءُ اشکرانی ڈوک ماں کنگ ءَ سربُرزی ءَ چکرّینگ ءُ سِنگ ءِ جَنَگ ۔آلم تَرّینگ : بیرک ءُ بند یرا ءِ سُرینگ پہ دومی مردم ءِ ھال دیگ ءُ سھیگ کنگ ءِ ھاتر ءَ ۔اولاک ءِ تَرّینگ: پہ دَر آرگ ءِ ھاتر ءَ بَگّ ءِ تَرّینگ : بگّ ءِ سر ءَ ماں ترّگ ءُ آئی ءَ پد ءَ واترّدیگ ، بگّ ءِ پانپائی کنگ ۔بندانی تَرّینگ یا مالانی ترّینگ : بزاں جتگیں بند ءُ مالاں پد ءَ پچ گرگ ءُ آرگ۔بیر تَرّینگ :کسے اگاں بَدے یا زاھے بِدَنت آئی ءِ بدل ءَ آئی ءَ ھم زاھے دیگ یا کہ ھما بد ءَ پد ءَ آئی ءِ جند ءَ گْوندگ۔بھر ءِ تَرّینگ: دگرے ءِ بھر ءُ ونڈ ءَ پہ وت کشّگ یا کہ دگہ سیمی مردمے ءَ دیگ۔پاداں تَرّینگ : کسے ءَ پیادگ ءَ ترّینگ ءُ گَردینگ۔پِٹُّکی تَرّینگ : آپانی تہ ءَ پِٹُّکی چکرّینگ کہ بہ سَنگر اِیت ۔پچ تَرّینگ : پد ءَ تَرّینگ ، واترّینگ ،پد ءَ گَردینگ۔پَد تَرّینگ : پچ تَرّینگ ،بیرہ دیگ ،واترّینگ ۔پِر تَرّینگ : گشینگ ،چہ یک جاورے ءَ پہ دگہ جاوَرے تَرّینگ ۔پُشت تَرّینگ : پُشتی نیمگ ءَ تَرّینگ ،وتی پُشت ءَ تَرّینگ بزاں دیم ءَ ھمانگو کنگ ۔تاک ءِ تَرّینگ : کِشار ءِ تَرّینگ کہ چد ءُ رند گَرگ مہ جنت۔جَلّک تَرّینگ : پہ جلّک پَشم یا بندیک ریسگ ۔جَلّکی تَرّینگ : چو کہ جَلّک ءِ تَرّینگ۔جواب تَرّینگ : پسّو ءِ تَرّینگ ،جواب دیگ ۔چَمّاں تَرّینگ : مردمے ءَ چارگ ءُ پد ءَ پہ نواھگ یا نادوستی چَمّاں تَرّینگ ۔چَمّاں پِر تَرّینگ: چمّاں ترّینگ ،چمّانی سْیاھگ ءِ روگ ءُ اسپیدگ ءِ زاھر بیگ، چمّانی پسّی بَیگ ۔چیر تَرّینگ : چیرگ کنگ ، انچوش کنگ کہ دگہ چیزانی چیر ءَ بہ بیت ، وامدار کنگ ، کُٹّگ ، گیش بَیَگ ۔دَپّ ءِ تَرّینگ : یک برے یک گَپّے کنگ بلے پد ءَ ھما گپّ ءِ سر ءَ نہ اوشتگ ءُ آئی ءَ دگہ رنگے تَرّینگ ۔دست ءِ ترّینگ : کارے ءِ کنگ ءَ دست ءَ ھور کنگ ۔دل ءِ تَرّینگ : دِل ءَ پہ کجام نیمّونی ءَ پہ وتی نیمگ ءَ واھگدار کنگ ،کسے ءِ دل ءَ چہ دگرے ءِ دوستی ءَ تَرّینگ ءُ وتی واھگدار کنگ ۔دیم ءِ ترّینگ: دیم ءَ چہ دگہ دیمے ءَ پہ دگہ دیمے تَرّینگ ۔دین ءِ تَرّینگ : وتی دین بزاں نیکراہ ءَ مَٹّ کنگ ءُ دگہ نیکراھے وتی کنگ ۔راہ ءِ تَرّینگ: راستی نیمگ یا چَپّی نیمگ ءَ تَرّگ ۔زَھر تَرّینگ : ماں آپ یا شربت یا دگہ انچیں آپینکے ءَ زھر ماں کنگ ، زھر گرائینگ۔زھم تَرّینگ : پہ لیب ءَ زھم ءَ انچوش تَرّینگ کہ گْوش ئے زاناں ماں جنگ ءُ مِڑ ءَ اَنت۔ساد تَرّینگ : ساد ھر دوئیں سراں دست ءَ کنگ ءُ آئی ءِ لوپ ءَ چہ سر ءَ تَرّینگ ءُ پد ءَ سَٹّ کنگ ءُ چہ پادانی چیر ءَ ھم تَرّینگ ، لیبے ۔ساہ تَرّینگ : مُرتگیں مردم ءِ ساہ ءَ پد ءَ آرگ ءُ آئی ءَ زندگ کنگ ۔سر ءِ تَرّینگ : مُردگ یا کہ نادْراھے ءِ سر ءَ چہ یک نیمگ ءَ گردینگ، انچوش کنگ کہ یکّے ءِ سر بہ ترّ اِیت ، اولاک ءِ سر ءَ تَرّینگ بزاں واگاں تاب دیگ ۔سر ءَ تَرّینگ : چیزے ءَ کسے ءِ سر ءِ چَپّ ءُ دیم ءَ تَرّینگ ءُ سلام گْوشگ کہ چِد ءُ رند نماز کٹّ اِیت ۔سٗوب ءِ تَرّینگ : کَٹّ ءُ سوب ءَ پہ وت یا پہ دگرے تَرّینگ بزاں پہ دگرے ءَ باج برگ ۔سْیاد تَرّینگ : پہ وت ءَ پہ کجام نیمّون ءُ رِپک ءُ ھُنر سْیاد پیداک کنگ ۔سْیاہ تَرّینگ : سْیاہ کنگ ۔گپّ ءِ تَرّینگ : یک گپّے کہ بیگ ءَ اِنت کہ چہ ایشی جیڑہ ءُ اَڑ یا تژن ءُ شگان یا دگہ انچیں چیزے پیداک بہ بیت آ گپّ ءِ بدل کنگ ءُ دگہ بُنگپّے بنگیج کنگ ، گپّ ءِ نہ منّگ ، ھَبَر ءِ نہ زیرگ ۔گُٹّ ءِ تَرّینگ : ماں لچّہ گْوشگ یا ماں سوت ءُ نازینک گْوشگ ءَ پہ چیٹّ ءُ زیمر وتی گُٹّ ءِ آواز ءَ بُرز ءُ جھل کنگ ، وتی آواز ءَ انچیں رنگے بدل کنگ کہ پجّاہ آرگ مہ بیت ۔گُد ءِ تَرّینگ : پہ بھا کنگ ءِ ھاتر ءَ میتگ ءَ بِرگ ءُ ھر کس ءَ پیش دارگ ، چادر ءَ تَرّینگ : بزاں پہ داد ءِ ھاتر ءَ دیوان ءِ مردمانی دیم ءَ گُدے ماں دستاں گرگ ءُ گْوازینان کنگ کہ آئی ءِ تہ ءَ زَرّ ریچگ بیت ، پہ کسے ءِ اِشارہ کنگ ءُ مالوم وار کنگ ءَ چہ دُور ءِ گُد یا چادرے سراں بُرزی چکرّینگ ءُ سُرینگ ،آلم کنگ ۔گُڈّ ءِ تَرّینگ : چہ مردمے ءِ مِرگ ءَ رند کہ آئی ءِ سیاد ءُ وارس مَہ بیت آئی ءِ مال ءَ سردار یا سرکار وت زیر اِیت کہ ایشی ءَ ‌« گُڈّ » گْوش اَنت بزاں گُڈّ ءِ مال ءَ پہ وت ءَ ترّینگ یا کہ وتی کنگ ۔لاپ ءِ تَرّینگ : ھزمت کنگ ءُ لاپ ءِ شوھاز کنگ ، درمان ءِ لاپ ءَ تَرّینگ : بزاں چہ رِچگ ءَ یا کہ نادْراھی ءَ جوڑ تِر یا گَندہ تر کنگ .لاٹور ءِ تَرّینگ : ٹاگار ءِ تَرّینگ ءُ توارینگ۔لانٹیگ ترّینگ : لیبونکیں ،، لانٹیگ ءِ کش پتایگ ءُ تَرّینگ ءُ توارینگ۔لانکیک تَرّینگ : پہ کسے ءِ ھال دیگ ءَ لانکیگ ءَ دست ءَ کنگ ءُ سر ءِ برز ءَ چکرّینگ انچوش کہ آلم یا بیرک تَرّینگ بیت ۔لگام ءِ تَرّینگ : اپس ءِ واگاں تَرّینگ ۔لَھم تَرّینگ : نَرم کنگ ،انچوش کنگ کہ لَھم ءُ نرم بہ بیت ۔مال ءِ ترّینگ : دگرے ءِ مال ءَ پہ وت تَرّینگ ءُ وتی کنگ ، پس ءُ گٗوک یا انچیں دلوت ءِ پہ وت تَرّینگ یا کہ چَرَگ ءَ برگ ، رَمَگ ءِ دَوار دیگ بزاں یکجا مُچّ کنگ یا بیرہ دَیَگ ۔ماں تَرّینگ : ساد یا دگہ انچیں چیزے ءَ دگہ چیزے ءِ پشت ءَ تَرّینگ کہ چو کہ پتایگ ءَ بیت ، کسے ءِ سر ءَ ماں تَرّگ ءُ آئی ءِ گٹّ کنگ ، گوں کسے ءَ پہ ھَکّل ءُ ھوکل ءِ ھاتر ءَ تْرند گپّی کنگ ، دَپ جنگ کنگ ۔مَرد تَرّینگ : دلیر کنگ ،بھادر کنگ ۔مَرد ءِ تَرّینگ : یکّے ءِ مَرد ءَ پہ وت بَرَگ بزاں یک جنینے ءِ دگہ جنینے ءِ مَرد ءَ چہ آئی ءَ سِندگ ءُ گوں وت سنگت کنگ یا گوں آئی ءَ سِیر کنگ ، مردمے ءِ چہ دِگرانی دست ءَ بَرگ ۔مردماں ترّینگ : مردماں پہ لوٹُکے یا دگہ کارے ءَ ھمراہ کنگ ءُ برگ ۔مَرگ ءِ ترّینگ : مرگ ءِ جند ءَ بیرہ دیگ ، کسے ءَ چہ مرگ ءَ رکّینگ ۔ملک ءَ ترّینگ : ھمراہ کنگ ءُ مُلک ءَ بَرَگ ءُ پیش دارگ ۔ملک ءِ ترّینگ : یک سرکارے ءِ دگہ سرکارے ءِ ملک ءَ پہ زٗور برگ ءُ وتی کنگ ءُ پہ وت ترّینگ ۔مھار ءِ ترّینگ : اُشتر ءِ واگاں ترّینگ کہ چپّ یا راست ءَ بہ تَرّ اِیت۔میار ترّینگ : کسے ءَ پہ کارے یا کار سواری ءِ ھاتر ءَ گْوشگ کہ چہ آئی ءَ کُمک لوٹگ اِنت ۔میار ءِترّینگ : کسے ،، میار،، ءَ پہ وت ترّینگ بزاں آئی ءِ ڈبّہ ءَ وتی سر ءَ زیرگ ، میار ترّینگ ۔نام ءِ ترّینگ : نام ءِ مٹّ کنگ یا بدل کنگ ، یک نامے سَرچِنَگ ءُ دگرے پِرکنگ . پہ دُزّ ءِ دَرگیجگ ءَ چو ،، نام سوچ ،، ءَ باز مردم ءِ نام ءَ ماں کسانیں کاگدانی سر ءَ جِتا جِتا نَبیسّ اَنت ءُ یک یکّ ءَ ماں کلام اللہ ءَ کنگ ءُ آئی ءِ چکّاسگ ،ایشی ءَ ،،کلام ترّینگ،، ھم گْوش اَنت ۔نَپر ءِ تَرّینگ : پہ مردمانی ھال دیگ ءَ نپر دیم دیگ کہ ھر کس ءَ ھال بِدَنت . کسے ءِ نپر ءَ بیرہ دیگ یا پہ وَت بَرَگ ۔نماز ءِ تَرّینگ : پد ءَ نماز کنگ ، بزاں نماز ءِ تہ ءَ رَد کپگ ءُ ھمے نماز ءَ پد ءَ دومی گشت ءَ کنگ ۔واب ترّینگ : واب گیجگ ( بچار ،، واب ترّگ ،،)واگ ءِ یا واگاں تَرّینگ : اَپس ءِ یا دگہ اولاکے ءِ واگاں تاب دیگ کہ چَپّ یا راست ءَ بہ تَرّ اِیت ۔ھبر ءِ ترّینگ : ھَبَر ءِ نہ زیرگ ۔ھراں تَرّینگ : بزاں واترّ دیگ ، بیرہ دیگ یا چارینگ ۔ھُشک تَرّینگ : ھُشک کنگ ، ھیراں کنگ ۔ھٗور ترّینگ : یکجا کنگ ، ھَوار کنگ ،لٗوڑ کنگ.