to main page
Sayed Ganj Balochi Glossary [Sayad Zahoor Shah Hashmi]

پشت

  1. [(پَ. شْ. تْ)]
    دُور، دیر، یک کِرّ ءَ ، گِستا، یک کَنِکّ ءَ ، رَند، پہ اشتر ءَ گْوش اَنت "پَشت پَشتْ !!" کہ پَشت تِر کِنز اِیت یا ٹِکّ اِیت. بتل: "چہ پَشتیں کِشار ءَ مھلئیں وامے شرتر اِنت" بزاں ھما کِشار چہ دْرستان ءُ رند رون بہ بیت چہ آئی ءَ مھلئیں وامے شرتِر اِنت کہ ڈکّے ءَ کیت.پَشت دارگ: دُور دارگ، گِستا دارگ، یکّرّ ءَ ءُ یک کَنِکّ ءَ دارگ.پَشت رَوَگ: دُور روگ، یکّرّ ءَ روگ.پَشت سَر: پدکا یا پدکائی، پُشتکا یا پُشتکائی. پَشت سر کپگ: پُشتکا کپگ انچوش بیگ کہ سر ءِ پُشت زمین ءَ بہ کپ اِیت، پُشت سر کپگ.پَشت کپگ: چہ وتی ھمراھاں رند کپگ بزاں ھمراہ رو اَنت ءُ اے رند ءَ پَشت کپ اِیت. چیزے ءِ پَشت کپگ بزاں سرآیگ، گیش بیگ کہ سرکیت.دُور پشت کپگ: تئی میتگ چہ آ کوہ ءَ پَشت کپتگ یا کپ اِیت بزاں دیر اِنت. پہ گْروھتاچی ءَ رند ءِ مردم پَشت کپ اِیت.وانگ ءَ پَشت کپگ: پلانی چہ آ دگہ نودربراں چار دروَنت ءَ پَشت کپتگ.چہ کُٹم ءَ پَشت کپگ: چہ وتی کُٹمدان ءَ ھمے یکّیں بچک پشت کپتگ ءُ بس آ دگہ دْرست مُرتگ اَنت، کُشگ بوتگ اَنت یا دگہ رمگے بیران بوتگ اَنت.پَشت کِنزگ: پد کِنزگ، پُشت کِنزگ، کم کم ءَ یکپارگی پُشتی نیمگ ءَ پُشتکا روگ.پَشت گیجگ: دگرے ترا "پَشت گیج اِیت" بزاں چہ ترا گْوز اِیت ءُ دیم ءَ روت یاکہ تو وت ءَ وت "پَشت گیج ئے" کہ رند ءَ دار ئے یا کِلّ ئے کہ دگرے چہ ترا بہ گْوز اِیت ءُ بہ روت. رندگیجگ، سرآرگ بزاں چہ بازیں چیزے ءَ لھتے زیرگ ءُ لھتے پشت گیجگ. چہ کار ءَ یا پہ وھد جاگھے ءِ رسگ ءَ پشت گیجگ بزاں انچوش کنگ کہ پہ وھد کار کنگ یا جاگہ ءَ رسگ مہ بیت. بے سوب کنگ "اے پشت کپگ" ءِ گِشکارگال اِنت بزاں تو وت پَشت نہ کپ ئے بلے دگرے ترا "پشت گیج" اِیت.
    Synonym: پَشت
  2. [(پُ شْ. تْ)]
    دیم ءِ چپّ، ھرچیزے کہ پتن اِنت آئی ءِ دو دیم اَنت شرترین ءَ "دیم" ءُ دومی ءَ "پُشت" گْوش اَنت. انچوش کہ مردم ءِ دیم ءُ پُشتی نیمگ. گُد ءِ چَپّ. مردم ءِ دست یا پاد ءِ بَڈّ. مردم ءِ جند ءِ بَڈّ. ھما چیری اندام کہ چمود ءَ درائی درکیت یاکہ آئی ءِ بیلّانڈ ءِ کُٹّ اِتگیں سر کہ چہ نادْراھی یے ءَ ڈنّ ءَ ھم در کیت.(2) مردم ءِ پِت ءُ پیرک یا برزگیں پیر ءُ کراماتی. پہ نزوریں مردمے ءَ زوراکیں درّرائینوک ءُ آئی ءِ پھریزوک. مجول ءِ پُشت بزاں ڈُمپیں بَڈّ ، مجول ءِ دومی دیم کہ کنڈ اِنت آئی ءَ دیم گْوش اَنت. جنینوئیں مردین.دل ءِ پُشت: سینگ ءِ سر اک: "پلانی من وتی دل ءِ پُشت ءَ کُرتگ" دل ءِ پُشت ءَ دارگ بزاں سکّ ساٹگ.ھر ءِ پُشت: ھر ءِ بَڈّ، بے بیسھیں مردم یا چیز، دگہ چیزانی نام کہ کارمرز بنت: چمّ ءِ پُشت، سر ءِ پُشت، زمین ءِ پُشت، زھم ءِ پُشت، کارچ ءِ پُشت، لوگ ءِ پُشت.پُشت بیگ یا بوگ: پہ کسے ءَ درائینوک یاکہ پہ آئی ءِ چہ تاوان ءَ پھریزگ ءَ کمکّ ءُ دیمپان بیگ.پُشت پد بیگ: پُشپد بیگ: کُٹم ءُ لوگے ءِ مردمانی ءُ آیانی پیرینانی نام ءَ ایشانی مستر ءُ کماش بیگپُشت پِر کنگ: دیم ءَ ترّینگ ءُ پُشت ءَ گوں مردماں کنگ، اے رنگ ءَ گیشتر پہ زھر ءُ کُنّت ءُ نزانتکاری کنگ بیت.پُشت جنگ: بے پْرواہ بیگ: بدیں رنگے ءَ بے ریا بیگ، گْوش اَنت"پلانی ءَ دْرستیں مھلوک پُشت جت ءُ شُت" بزاں کسی پرواہ ئِے نہ کُرت ءُ شُت یاکہ ھمراھداری ئِے نہ کُرت. ھشتی لیب ءَ ھَشت ءِ داراں پہ سِنگ ءَ جنگ ءُ لوٹگ کہ دار پُشت بہ بنت. یک مردینے ءِ دگہ مردینے ءَ چوکہ جنین ءَ کارمرز کنگ.پُشت دیگ: پُشت ءَ ترّینگ یا دیم ءَ دومی دیم ءَ ترّینگ ءُ روگ. مردینے ءِ وت ءَ گوں دگہ مردینے ءَ چوکہ جنین ءَ کارمرز کنائینگ.پُشت کنگ: روگ، جاگھے ءِ روگ ءُ پد ءَ نیایگ، پُشت دیگ ءُ روگ. کسے ءَ وتی وتی درائینوک یا کُمکّ دیوک کنگ.پُشت گوش کنگ: گپّ ءِ پہ زانت نہ اشکنگ، گپّ ءِ نہ زیرگ، ھبر نہ منّگ، بے پرواھی کنگ.پُشت ءَ بندگ: بَڈّ ءَ بندگ، ڈُبّہ ءَ زیرگ.پُشت ءَ پِر دیگ: پُشت ءَ ترّینگ پہ روگ، پُشت دیگ ءُ روگ. دیوان ءَ وتی پُشت ءَ گوں مردماں ترّینگ ءُ نندگ کہ بدیں چیزے پہ زھر یا نزانتکاری چوش کنگ بیت بلے اے دومی رنگ ءَ "پُشت پِر کنگ" ءِ گالبند راست اِنت.پُشت ءَ پِر کنگ: دیوان ءَ ھرکس دیم پہ دیم نشتگ اَنت وتی پُشت ءَ گوں آیاں کنگ ءُ نندگ کہ پہ زھر یا نزانتکاری چوش کنگ بیت. پہ اے گالبند ءَ "پُشت ءِ پِر دیگ" ھم کارمرز بیت بلے نزور اِنت.پُشت ءَ ترّینگ: پُشت پِر کنگ، دیم ءَ ترّینگ کہ پُشت گوں مردماں بہ بیت.پُشت ءَ جنگ: پُشت جنگ، بے پرواہ بیگ، چہ دود ءُ ربیدگ ءَ بے پرواہ بیگ گْوش اَنت"پلانی ءَ چہ مردماں وتی پُشت جت ءُ شُت" بَڈّ جنگ، بڈّ ءَ کنگ بار یا میارے ءِ بڈّ ءَ جنگ ءُ روگ. پُشتی نیمگ ءَ جَنگ، چیزے ءَ یاکہ پہ کارے ءِ کنگ ءَ گْوش اَنت "پلانی ءَ دیم ءَ جت ءُ پُشت ءَ جت ءُ وتی کار شر کُرت" کسے ءِ زرّ یا مال ءَ پہ زوراکی یا ریپینگ ورگ ءُ برگ ءُ جواب دیگ بلے پہ ایشی ءَ "پُشت کشّگ" یا "چیر کشّگ" ءِ گالبند شرتر اَنت.پُشت ءَ چارگ: چَکّ جَنَگ ءُ پُشتی نیمگ ءَ چارگ. وتی گْوستگیں زندمانی ءَ تْرانگ ءَ آرگ یاکہ وتی لوگ ءُ چُکّانی بارہ ءَ سسّا کنگ.پُشت ءَ چنڈگ: پُشت ءَ دْرنزگ کہ اگاں چیزے پُشت ءُ بڈّ ءِ سر ءَ اِنت بہ کپ اِیت. پہ چیزے ءِ بڈّ ءَ کنگ ءِ ھاتر ءَ آئی ءَ گوں دوئیں دستاں پہ تْرندی بُرز ءَ دْرنزگ ءُ زیت زیت ءَ بَڈّ ءَ چیر دیگ ءُ آئی ءَ بَڈّ ءَ کنگ. چیزے ءِ پُشت ءَ شکر یا واد یا دگہ انچیں چیزے ءِ پرشانگ، چیزے انچوش دْرنزگ کہ پُشتی نیمگ ءَ بہ کپ اِیت.پُشت ءَ دْرنزگ: وتی پُشت ءَ انچوش چنڈگ کہ اگاں آئی ءِ سر ءَ چیزے بہ بیت آ بہ کپ اِیت. نہ منّگ، چیزے ءِ پُشت ءَ شکر یا واد رنگیں چیزے ءِ پِرشانگ. انچوش چنڈگ کہ پُشتی نیمگ ءَ بہ کپ اِیت.پُشت ءَ روگ: پدی نیمگ یا پُشت ءِ نیمگ ءَ روگ. پَد کِنزگ، چہ کارے ءِ کنگ ءَ تیار نہ بیگ ءُ پد کِنزگ. کسے ءِ پُشت ءَ روگ: آئی ءِ رند ءَ روگ پہ رندگیری یا پہ چاریگی.پُشت ءَ کپگ: کسے ءِ رند ءَ کپگ پہ اُمیتے. کسے ءِ رند ءَ کپگ پہ آئی ءِ تاوان دیگ ءِ ھاتر ءَ . رند ءَ پَشت کپگ. دیر کپگ.پُشت ءَ کِنزگ: پد کِنزگ: چہ کارے ءِ کنگ ءَ وتی پاداں دارگ. پُشتکا کِنزگ، بے دل ءُ تُرسوک بَیگ. ھمراھانی یلہ دیگ.پُشت ءَ کَشّگ: وت ءَ پُشت ءَ کشّگ، رند ءَ دارگ، کسے ءِ مال یا زرّ یا دگہ چیزے پہ زور وتی کنگ ءُ نہ دیگ یاکہ چیزے ءَ پہ کار سواری لاڑامی پچ گِرگ ءُ پد ءَ جواب دیگ ءُ نہ دیگ.پُشت ءِ آیگ: کسے ءِ رند ءَ بزاں رند ءَ رند ءَ آیگ. چہ درآئی ءِ راہ ءَ بیلّانڈ ءِ سر ءِ درآیگ کہ نادْراھی یے. پہ کسے ءِ کمکّ ءَ آئی ءِ کمکّ دیوک ءِ آیگ.پُشت ءِ پِر بیگ: دلجم بیگ ءُ چہ ھر رنگیں پکراں زِھگ بزاں درستیں کارانی سرجم بیگ ءُ شر بیگ کہ دگہ ھچ رنگیں گم ءُ گرٹّی نہ بیگ، ایمن بیگ.پُشت ءِ پِر کنگ: دیوان ءِ تہ ءَ کہ مردم دیم پہ دیم نشتگ اَنت وتی دیم ءَ ترّینگ ءُ پُشت ءَ گوں مردماں کنگ کہ چوش پہ زھر ءُ کَست ءَ یا نزانتکاری کنگ بیت. بے پرواہ بیگ.پُشت ءِ تل ءِ آرگ: ھمنچک جنگ کہ کسے ءِ بڈّ ءِ پوست دیر بئیت.پُشت ءِ چنڈگ: بڈّ ءَ دْرنزگ کہ آئی ءِ سر ءَ اگاں چیزے ھست آ بہ کپ اِیت.پُشت ءِ درآیگ: پُشت ءِ آیگ: بزاں چہ درآئی ءِ راہ ءَ بیلّانڈ ءِ سر ءِ درآیگ کہ نادْراھی یے. پہ کسے ءِ کمکّ ءُ دیمپانی کسے ءِ دیم ءَ درآیگ.پُشت ءِ سُچگ: نادْراھی یے کہ درائی ءِ جاگہ سُچ اِیت. بَڈّ ءِ سُچگ ، چہ کسے ءِ بے رھبندیں کاراں سوکیگ بیگ.پُشت ءِ لتارگ: بڈّ ءِ لتارگ پہ چِلّ ءِ دیر کنگ یا پہ دگہ نیمونے ءَ ، بڈّ ءِ کچینگ، کسے ءَ پہ کارے ءِ کنگ ءَ بہ گْوش ئے کہ پیش ءَ آئی ءَ وت ھدوناکی پیش داشتگ بلے کنگ ءِ باریگ ءَ نیمّون شوھاز کنت، جواب ھم دات نہ کنت نی گڑا بَڈّ ءَ لتار اِیت یا سر ءَ کچین اِیت.پُشت ءِ ماں دیگ: پہ روگ، پُشت ترّینگ ءُ روگ. گْوش اَنت "پلانی ءَ پُشت ماندات ءُ شُت".
    Synonym: پُشت
^ top of page