آپ

ھمے آپ اِنت کہ ورگ بیت. گوں ایشی ءَ گُد ءُ جان شُودگ بیت. چہ آکسیجن ءُ ھائیڈروجن OXYGEN & HYDROGEN ءِ یک جاہ بَیَگ ءَ جوڑ بیتگیں آپین ءُ بے رنگیں تَلوکیں چیز کہ سکّیں گرمی ءَ باپ بیت ءُ بال کنت ءُ ھُشک بیت ءُ سکّیں سارتی ءَ بد اِیت. ماں دریا، دریاب، کَور، جُو، کھن ءُ چات ءُ چمّگاں بیت. چہ جمبراں رِچ اِیت „ ھور ئِے گْوشیں ـ ءُ چہ چمّاں رچ اِیت „ ارس„ گرماگ ءَ جان ءَ تْرُکّ اِیت „ ھید„ گْوشگ بیت ـ ءُ چہ ساھین ءَ درکیت „ آبدست„ اِنت گیلکی ءَ ایشی ءَ „ اُو „ گْوش اَنت، پارس ءَ اَو، پارسی ءَ: آب، پھلوی ءَ: آب یا آف، سعدی: آپ، اوستائی ءَ: „ آپَ „ ھندی ءَ: جَل یا پانی، تازی: ماء، ءُ انگریزی ءَ: واٹر WATER پشتو ءَ: اُبُّو، مبلاری: وِلّم، مدراسی ءَ: تَنّی ـ مری بولی ءَ ھم ایشی ءَ „ آف ءُ آفھ „ گْوش اَنت بُنرھبند „ آب „ وھدے کہ ماں گپّاں کارمرد بیت گڑا باز جاگہ ءَ چوکہ یک چیزے ءَ بیت: " اِے چات ءِ آپ سور اِنت " ءُ باز جاگہ ءَ چوکہ باز ءَ اک:„ اِے کاشیگ ءِ آپ شرّ نہ اَنت „ ھمے رنگ ءَ: دریا ءِ آپ، چات ءِ، کَور ءِ، جُو ءِ آپ „ یکّے„ ءُ جَھلگ، کاشیگ ءُ دگہ دَرپانی آپ „ باز„ اَنت پہ چَنکے، پِٹّے، گُلاٹے گُٹّے، گِلاسے ، ءُ جَھلگے ءِ آپ ءَ یکّی ءِ „ ے „ کارمرز بیت.