Holy Quran Pashto Translation [Kabuli Tafseer; M. Q. Kashaf; islamlacom.com]
(
(1 (2 (3 (4 (5 (6 (7 (8 (9
(40 (41 (42 (43 (44 (45 (46 (47 (48 (49 (4:

Give us a like, if you really like us! که ستاسو دغه پاڼه خوښيږي نو يې لطفا په يو لايک ونازوئ

(48:1) (آيت نمبر:سورة نمبر)
إنا فتحنا لك فتحا مبينا

بِسْمِ اللَّهِ الرَّحْمَٰنِ الرَّحِيمِ إِنَّا فَتَحْنَا لَكَ فَتْحًا مُبِينًا
له کابلي تفسير څخه پښتو ژباړه:
 بيشكه چې مونږفتح اوبرى مودركړى دى تاته فتحه اوبرى ظاهراوښكاره
د مولوي قيام الدين کشاف پښتو ژباړه:
اى پيغمبره ! مونږ تاته ښكاره فتحه دركړه
له کابلي تفسير کتاب څخه پښتو تفسير:
 تفسير : د ( حديبيى ) روغه كه څه هم په ښكاره ډول د ذلت او د مغلوبيت روغه په نظر راځي او د هغې د شرايطو له لوستلو څخه په بادى النظر كې دا محسوس كيږي چې ګردې خبرې د قريشو په ګټه دى ــ لكه حضرت عمرالفاروق او نورو اصحاب الكرام رضي الله عنه ددې روغې د ښكاره تورى له كتلو څخه سخت خفه ، محزون ، مضطرب او پريشان وو دوى خيال كاوه چې د مسلمانانو ددې يو نيم زر سر جارونكى لښكر په مخ كې قريش او د هغوى نور طرفداران څه اهميت لرى ولى ددې راز ګردو جګړو پرې كړه او فيصله په توره سره ونه كړه شى ؟ مګر د رسول الله صلی الله عليه وسلم سترګى هغه احوالو او نتيجو ته وى چې د نورو له سترګو څخه به پټه وى ځكه چې الله جل جلاله د دوى ټټر د ډيرو سختو پيښو د تحمل دپاره پرانيستلى وو دوى په بې مثاله استغنا توكل ، تحمل او ايثار سره هغه شرطونه ومنل او خپلو اصحابو ته يې په دې لنډو توريو ( الله ورسوله اعلم ) سره ډاډينه او تسلى وركوله يعنې الله جل جلاله او د هغه رسول په داسې خبرو باندې ډير ښه پوهيږي .
تر څو چې دا سورت نازل شو او الله جل جلاله ددې روغى او فيصلى نوم ( فتح مبين ) كيښود خلكو په دې باندې هم تعجب كاوه او ويل به يې يا رسول الله صلی الله عليه وسلم دا برى دى ؟ حضرت نبوى صلی الله عليه وسلم به فرمايل چې ( هو ! لوى برى دى ) حقيقت دادى چې د اصحابو د جهاد بيعت او له هغه معمولى كش او كوك څخه وروسته ګرد كفار او معاندين وويريدل او د روغى په لورى يې خپلې خوښى ښكاره كړى او نبى كريم صلی الله عليه وسلم سره له دې چې پر جنګ او انتقام باندې يې پوره قدرت درلود خو بيا هم په هر ځاى كې به يې له عفوى ، اغماض او حلم څخه كار اخيست او محض د بيت الله شريف د تعظيم دپاره د هغوى په هغو چټى غوښتنو باندې نه په قهركيدل دا پيښې له يوه لورى د الله جل جلاله د خصوصي مدد او رحمت د استجلاب وسيله ګرځيدى او له بل لورى د دښمنانو په زړو كې د اسلام اخلاقى او روحانى طاقت او د رسول الله صلی الله عليه وسلم د صبر او تحمل او د شان مينه او اثر په زړو كې زيا تاوه اګر كه د عهد نامى د ليكلو په وخت كې ځينو ښكاره ليدونكيو به د كافرانو برى ليدل خو كه په سړه سينه دې پيښې ته كتل كيداى او د هغې شاوخوا ته ځيروالى شوى واى او وروسته له غور كولو او له وړاندې وروسته سنجولو څخه به هر سړى په دې پوهيده چې دا ګردې فيصلى د اسلام په ګټه شوى دى نو ځكه الله جل جلاله د هغې نوم ( فتح مبين ) كيښود او تنبيه يې وفرمايله چې دا روغه اوس هم روغه ده او په راتلونكى كې به هم دوى ته د ظاهرى او باطنى ډيرو فتوحاتو ور ونه پرانيځى لكه چې له دې روغى څخه وروسته د كافرانو له مسلمانانو سره ناسته ولاړه اختلاط شروع شو او بې تكلفه به يې سره ليدل او خبرې او اترې به يې سره كولى او كافرانو د مسلمانانو له خولو څخه د مسلمانى خبرې اوريدلى او ددغو مقدسو مسلمانانو اقوالو ، احوالو ، اعمالو او اطوارو ته به يې كتل چې له دى ګردو پيښو او نندارو څخه هرومرو د دوى په زړو كې د اسلام مينه پيداكيده آخره نتيجه دا شوه چې د حديبيى له روغى څخه د مكى تر برى پورې يعنې د دوو كلو په موده كې ډير خلك مسلمانان شول او اسلام زيات خپور شو .
خالد بن الوليد او عمرو بن العاص غوندې نوميالى ميړونه هم په دې مدت كې مسلمانان شول او دا فتح او برى جسمى فتح او برى نه بلكې روحى فتح او برى وو او د حديبيى صلح مسلمانانو لره د لوى خير او بركت سبب شوه او اسلام په شاوخوا كې دومره منتشرشو چې د مكې معظمې د فتح كيدلو ګردى وسيلى راغونډى شوى او هغه سپيڅلى ځاى د تل دپاره د شرك له ګندګى پاكيدل يې آسان وګرځيدل په حديبيى كې له رسول الله صلی الله عليه وسلم سره يو نيم زر تنه اصحابان وو خو دوه كاله وروسته له دې څخه د مكې معظمې په عظيمى فتح كې لس زره توريالى لښكر له دوى سره و رښتيا خو داده چې نه يواځي د مكى او د خيبر فتح بلكې د نورو اسلامى فتوحاتو دپاره د حديبيى روغه لكه يو اساس بنياد او زرينه ديبا چه وګرځيده او هغه صبر او تحمل ، توكل او د حرمات الله تعظيم چې په دغه روغه كې ورڅرګندشو او د هغه علوم او قدسيه معارف او د باطنى مقاماتو او د مراتبو فتح الباب چې له دې پيښې څخه شوى دى د هغو اندازه څوك كولى شى ؟ هو ! د هغو لنډ اجمال او لږ اشاره حق تعالٰى په دې آيتو كې فرمايلى ده يعنې هسې چې دنيوى سلاطين كوم لوى فاتح سپه سالار په خصوصى اعزاز او اكرام سره پالى الله جل جلاله ددې فتح مبين په صله كې هغوى ته څلورصلى وربښلى دي اول د ذنوبو غفران ( له هميشه تر هميشه پورې د هغوى هغه ګردې ګوتاهى چې د هغوى د رفيعى مرتبى په اعتبار كوتاهى ګڼلى كيږي ګردى سره معافى دى ) دا خبره الله جل جلاله بل هيچا ته نه ده بښلى خو په حديث كې راغلي دي چې ددې آيت له نزول څخه وروسته رسول الله صلی الله عليه وسلم په عبادت كې دومره زيات زيار ايست چې كرى شپه به يې په لمانځه كې تيروله تردې چې د دوى پښى وپړسيدلى او د ګردو كتونكيو زړونه به پرى خوږيدل ــ اصحابو عرض وكړ چې ( يا رسول ولى دومره ربړونه په ځان ګالى ؟ د الله جل جلاله له لورى خو ستاسو ګردى پخوانى او وروستنى خطاوى بښلى شوى دى دوى به داسې فرمايل : ( افلا اكون عبدا شكوراً ) ولى زه د هغه شكر ګزاره بنده نشم ؟ ښكاره ده چې الله جل جلاله داسې زيرى خپل همغه بنده ته اوروى چې دى د هغه له اوريدلو څخه بې ويرى نه شى بلكې لازيات له الله جل جلاله وډار شى د شفاعت په طويل حديث كې راغلي دي كله چې خلك سره راټول شى د حضرت مسيح عليه السلام په حضور كې عرض كوى نو حضرت مسيح عليه السلام ورته وايي چې حضرت محمد صلی الله عليه وسلم ته ولاړ شى ! چې خاتم النبيين دى او د هغوى پخوانى او وروستنى ګرد ګناهونه بښلى شوى دى يعنې دده د شفاعت په مقام كې كه بالفرض كوم تقصير هم وشى نو هغه هم په عامه عفو كې پخوا له دې راغلى او پرته له دوى څخه بل څوك دا كار نشى كولى .
Source: {powered by: islamlacom.com}[ جُز يا پاره - حٰم 26 ؛ سورة - الفتح 48 ؛ آيت - 1 ] (48:1)